एमालेले लोकप्रिय मत पाएको टर्चबालेर हेर्दा पनि देखिँदैनः मिनेन्द्र रिजाल
काठमाडौं । प्रतिनिधिसभामा सरकारको तर्फबाट प्रस्तुत नीति तथा कार्यक्रमको सत्तारुढ दलका सांसदले समर्थन गरेका छन् भने विपक्षी दलका सांसदले भने विरोध जनाएका छन् ।
यही जेठ १० गते राष्ट्रपति विद्यादेवी भण्डारीले आगामी आर्थिक वर्षका लागि सरकारको तर्फबाट नीति तथा कार्यक्रम प्रस्तुत गरेकी थिइन् । सरकारको नीति तथा कार्यक्रममाथि आफ्नो धारणा राख्दै एमाले सांसद ईश्वर पोखरेलले सरकारले तटस्थ परराष्ट्र नीति सञ्चालन गर्न नसकेको आरोप लगाए । अघिल्लो सरकारको नीति तथा कार्यक्रमलाई समेत वर्तमान सरकारले समेटेको उनको भनाइ छ ।
नेपाली कांग्रेसका सांसद डा मिनेन्द्रप्रसाद रिजालले स्थानीय तहको निर्वाचनमा एक्लै लड्न नसकेर गठबन्धन गरेको भन्ने आरोप लगाउने एमालेले अहिले आएर हार स्वीकार गर्न नसकेर गलत प्रचार गरेको उल्लेख गर्दै लोकप्रिय मतका आधारमा पनि कांग्रेस माथि नै रहेको बताए । उनले पछिल्ला सबै निर्वाचनको विवरण पेश गर्दै कुन कालखण्डमा एमालेले लोकप्रिय मत प्राप्त गरेको हो भन्ने विषयमा इतिहास हेर्न आग्रह गरे ।
विपी कोइरालालाई नेपाल ताराको सिफारिस गर्नेले नै गलत टिप्पणी गरेकामा रिजालले आपत्ति प्रकट गरे । यो संसद्को कार्यकालमा कहिल्यै पनि एमालेको सरकारको नीति तथा कार्यक्रम प्रस्तुत नगरेको यर्थाथता प्रस्तुत गर्दै उनले नेकपाको सरकारको कार्यक्रम मात्रै आएको बताए ।
आफूले गर्न नसकेपछि एमाले अध्यक्ष केपी शर्मा ओलीले जथाभावी भन्न थालेको उल्लेख गर्दै डा रिजालले वर्तमान सरकारले राखेका कार्यक्रम आफ्ना लागे त्यसलाई खारेज गराउन चुनौती दिए । पछिल्लो चार वर्षको समय त्यतिकै खेर गएको उनको भनाइ थियो ।
रेल र पानीजहाजको सपना बाँड्दा यर्थाथताको धरातलाई सम्झन एमाले नेतृत्वलाई उनले सचेत गराए । डा रिजालले भने, “हजार माइलको यात्रा एकै पाइलाबाट सुरु हुन्छ भन्ने तथ्यलाई आत्मसात् गरौँ ।”
रिजालले स्थानीय तहको निर्वाचनमा कांग्रेसले लोकप्रिय मत पाएको बताए । उनले एमालेले कहिल्यै लोकप्रिय मत नपाएको दाबी गरे । उनले भने, ‘मतको संख्याको कुरा गर्दा भरपर्दो मानक वडा अध्यक्षले पाएको मत हो । कांग्रेसले ३४.३ प्रतिशत मत पाएको छ । तपाईंको पार्टीले ३३ प्रतिशत मत पाएको छ । हारे पनि खुट्टो त माथि नै छ भन्ने हो भने केही छैन ।’ रिजालले इतिहासको कालदखण्डमा पाएको मत टर्च बालेर हेर्दा पनि एमालेको लोकप्रिय मत नभएको दाबी गरे । उनले भने,‘इतिहासको कुन कालखण्डमा लोकप्रिय मत पाएको भन्नु भएको हो । टर्च बालेर हेर्नुपर्छ । टर्चबालेर हेर्दा पनि नि देखिँदैन ।’
