दोहा विमानस्थलमा निर्वस्त्र जाँच गरिएका अस्ट्रेलियाली महिलाले कतारमाथि मुद्दा दायर गर्ने

दोहा विमानस्थलमा जाँचका लागि विमानबाट ओरालेर वस्त्र फुकाल्न लगाएर सुत्केरी हो कि भनी परीक्षण गरिएका अस्ट्रेलियाली महिलाहरूले कतारमाथि मुद्दा दायर गर्ने भएका छन् । हमाद विमानस्थलमा एउटा भर्खरै जन्मिएको शिशु भेटिएपछि ती महिलालाई सन् २०२० को अक्टोबरमा एउटा उडानबाट ओरालेर उनीहरूले हालसालै बच्चा जन्माएको छ कि भनी परीक्षण गरिएको थियो ।

उनीहरूले आफ्नो अनुभवलाई राज्य स्वीकृत आक्रमण भनेका थिए र त्यसको सर्वत्र विरोध भएको थियो । कतारले पछि माफी माग्दै विमानस्थलका एक अधिकारीलाई जेल सजाय दिएको थियो ।

तर ती महिलाहरूले त्यसपछि त्यो घटनालाई बेवास्ता गरिएको बताएका छन् । उनीहरूलाई सशस्त्र सुरक्षाकर्मीले कतार एयरको विमानबाट ओरालेर एम्बुलेन्समा हालेका थिए। एम्बुलेन्समा नर्सहरूले उनीहरूलाई वस्त्र फुकाल्न लगाएर निरीक्षण गरेका थिए । महिलाहरूले आफूहरूले त्यसो गर्न स्वीकृति नदिएको र किन त्यसो गरिँदै छ भनेर आफूलाई नभनिएको बताएका छन् ।

पाँच मिनेट जतिको परीक्षणपछि ती महिलाहरूलाई पुनः विमानमा चढाइएको थियो । अस्ट्रेलियामा अवतरण गरेपछि केही महिलाले यसबारे प्रहरीलाई उजुरी दिएका थिए जसको कारण घटनाको थुप्रै राष्ट्रले निन्दा गरेका थिए । त्यस बेला कतारमा प्रधानमन्त्री खालिद बिन खालिफा बिन अब्दुलअजिज अल थानीले ट्वीट गर्दै माफ मागेका थिए ।

ती महिलाहरूले कतार सरकार, कतारको नागरिक उड्डयन प्राधिकरण र कतार एयरवेजसँग आक्रमण, अनधिकृत घुसपैठ र झूटो जेल सजायको क्षतिपूर्ति समेत मागेका छन् । सो घटनाका कारण मानसिक समस्या भोगिरहेकी एक महिलाले कतारी सरकारले केही नगरेका कारण आफूहरू मुद्दामा जान लागेको बताइन् ।