स्कूले बालबालिकामा गृहकार्यको चाप घटाउने चीनको प्रयास
चीनले विद्यालय समयपछि बालबालिकामा गृहकार्यको अत्यधिक चाप घटाउने उद्देश्यले शिक्षासम्बन्धी एउटा कानुन पारित गरेको त्यहाँका सरकारी सञ्चारमाध्यमहरूले जनाएका छन्।
चीनमा अभिभावकहरूलाई बालबालिकालाई आराम र व्यायामका लागि पर्याप्त समय सुनिश्चित गर्न र उनीहरू धेरै समय इन्टरनेटमा नझुम्मिने परिस्थिति बनाउन समेत भनिँदैछ । अगस्ट महिनामा चीनले छ र सात वर्षका बालबालिकाका लागि लिखित परीक्षा हटाइएको थियो ।
अधिकारीहरूले एउटा चेतावनी दिँदै त्यस समयमा उनीहरूको शारीरिक र मानसिक स्वास्थ्यमा हानि पुगेको बताएका थिए । गत वर्ष चीनले बालबालिकामा व्याप्त इन्टरनेट तथा पप कल्चर भनिने आधुनिक चालचलनको कुलत घटाउन विभिन्न उपाय थालेको थियो ।
शनिबार चीनको स्थायी विधायिकाको रूपमा रहेको नेशनल पीपल्स कङ्ग्रेसले नयाँ कानुन नै पारित गरेको हो । उक्त कानुनको पूर्ण विवरण अझै प्रकाशित गरिएको छैन। तर समाचारहरूमा त्यसले अभिभावकलाई बालबालिकाको नैतिकता, बौद्धिक विकास र सामाजिक व्यवहार निखार्न उत्प्रेरित गर्न सकियोस् भनेर ल्याइएको उल्लेख छ ।
स्थानीय सरकारहरू त्यसको कार्यान्वयनका लागि उत्तरदायी हुनेछन् जहाँ उनीहरूले अतिरिक्त क्रियाकलापलाई प्रोत्साहन दिने आर्थिक सहायता दिनेजस्ता काम गर्नुपर्नेछ । उक्त कानुनबारे त्यहाँको सामाजिक सञ्जाल वाइबोमा मिश्रित प्रतिक्रिया देखा परेको छ ।
त्यसको प्रशंसा गर्नेहरूले त्यसले असल अभिभावकत्व विकास गर्ने बताएका छन् भने आलोचना गर्नेले के स्थानीय अधिकारीहरू वा अभिभावकहरूले नै त्यसको पालना गर्लान् र भनेर प्रश्न उठाएका छन् ।
जुलाई महिनामा बेइजिङले देशभित्र मुख्य विषयहरू बढाउँदै लाभ कमाउने उद्देश्यले खोलिएका अनलाइन पढाउने केन्द्रहरू बन्द गरिदिएको थियो । नयाँ कानुनले उक्त क्षेत्रमा वैदेशिक लगानीलाई रोकेको छ यसअघि झन्डै १२० अर्ब अमेरिकी डलर बराबरको अनलाइन पढाउने क्षेत्रलाई रोकिदिएको छ ।
चीनमा अहिलेसम्मकै न्यून जन्मदर देखा परिरहँदा त्यस बेला उक्त कदमलाई बालबालिका हुर्काउन अभिभावकमा परेको चाप कम गर्ने सरकारको प्रयासका रूपमा हेरिएको थियो । त्यहाँ शैक्षिक असमानता समेत एउटा समस्याको रूपमा छ। सम्पन्न अभिभावकहरू ठूलो धनराशि खर्च गरेर आफ्ना सन्तानलाई उत्कृष्ट विद्यालयमा पढाउन चाहन्छन्।
