साफ च्याम्पियनसिपमा नेपालले श्रीलङ्कासँग प्रतिस्पर्धा गर्दै
काठमाडौं । नेपाली राष्ट्रिय फुटबल टिमले साफ च्याम्पियनसिपको दोस्रो खेलमा आज श्रीलङ्कासँग प्रतिस्पर्धा गर्दैछ । पहिलो खेलमा माल्दिभसलाई पराजित गरेको नेपाल लगातार दोस्रो जित हात पार्ने लक्ष्यसहित मैदानमा उत्रनेछ ।
पहिलो खेल बंगलादेशसँग हारेको श्रीलङ्का नेपाल विरुद्ध जित निकाल्दै पुनरागमन गर्ने प्रयासमा छ । खेल नेपाली समय अनुसार राति पौने दश बजे सुरु हुनेछ । नेपालका मुख्य प्रशिक्षक अब्दुल्लाह अल्मुताइरीले श्रीलङ्कासँग खेल कठिन हुने बताएका छन् । पहिलो खेलमा हात पारेको जितलाई विर्सिएर यो खेल खेल्ने उनको भनाइ थियो । आफ्ना खेलाडीलाई संयमित भएर खेल्न आग्रह गरेको बताएका अल्मुताइरले श्रीलङ्का वलियो टोली भएको उल्लेख गरे ।
आज तीन अंक बटुल्नका लागि ९० मिनेट संघर्ष गर्ने अल्मुताइरीको भनाइ छ । बंगलादेश विरुद्धको खेलमा श्रीलङ्का पराजित भएपनि उसले उत्कृष्ट खेल खेलेको प्रशिक्षक अल्मुताइरी बताउँछन् । सो खेलमा बंगलादेशले पेनाल्टी गोलमा एक शून्यको जित हात पारेको थियो । कप्तान किरण चेम्जोङले श्रीलङ्कासँगको खेल नेपाली फुटबल इतिहासकै सर्वाधिक महत्वपूर्ण खेल भएको बताएका छन् । तीन अंक टिमको मुख्य लक्ष्य उनको भनाइ छ ।
सफलता हात पार्नेमा किरण विश्वस्त छन् । आज जित निकाले ६ अंकसहित नेपालको फाइनल पुग्ने सम्भावना वलियो हुनेछ । नेपाल अहिलेसम्म साफको फाइनल पुगेको छैन । श्रीलङ्काका प्रशिक्षक आमिर एलगिचले दक्षिण एशियाली फुटबलमा हाम्रो पनि उपस्थिति छ भन्ने देखाउन चाहेको प्रतिकृया दिएका छन् ।
टिमको मुख्य लक्ष्य भनेको पुनरागमन रहेको उनको भनाइ थियो । नेपाल र श्रीलङ्का बीच साफ च्याम्पियनसिपमा अहिलेसम्म ५ भेट भएको छ । जसमा नेपालले मात्र एक खेलमा जित हात पारेको छ । अन्तिम पटक नेपालले सन् १९९९ को साफमा श्रीलङ्कालाई हराएको थियो । श्रीलङ्का तीनमा विजयी हुँदा एक खेल बराबरी भएको थियो । पछिल्लो पटक यी दुई बीच २०१५ को साफ च्याम्पियनिसको समूह चरणमा भएको भेटमा श्रीलङ्का एक शून्यले विजयी भएको थियो ।
