पूर्वमा उधौली, मध्यमा यःमरी र पश्चिममा तमु ल्होसार मनाईँदै
काठमाडौं । आज एकैदिन तीन फरक समुदायले तीन फरक चाड मनाउँदै छन् । पूर्वी नेपालमा किँरात समुदायले उधौली पर्व मनाउँदै छन् भने मध्य नेपालको काठमाडौं उपत्यका सहित नेवार समुदायको बसोवास रहेको क्षेत्रमा यःमरी पुन्ही मनाइदै छ ।
यस्तै पश्चिम नेपालको गण्डक क्षेत्रका गुरुङ समुदाय तमु ल्होसार मनाउँदै छन् ।
यी तीनै चाड विगतका केही वर्षयता राष्ट्रिय चाडको रुपमा समेत मनाउन थालिएको छ । पूर्वका किँरात समुदायले अन्नबाली भित्र्याएको खुशीयालीमा उधौली पर्व मनाउँदै आएका छन् भने नेवार समुदायले पनि अन्नबाली भित्र्याइसकेपछि अन्नको अभाव नहोस् भन्दै यःमरी बनाएर भकारीमा चढाएर यो पर्व मनाउने गरेका छन् ।
यस्तै तमु ल्होसारलाई गुरुङ समुदायले नयाँ वर्षको रुपमा मनाउँदै आएका छन् । च्यू ल्हो (मुसा वर्ष)को बिदाइ र ल्वों ल्हो (गाई वर्ष)को आगमनको खुशीयालीमा एकआपसमा शुभकामना साटासाट गरी तमु समुदायले यो पर्व मनाउने गर्दछन् ।
आज परेको तीन वटै पर्वको अवसरमा प्रधानमन्त्री, मुख्यमन्त्री सहित विभिन्न विशिष्ट व्यक्तिद्वारा शुभकामना प्रदान गरिएको छ ।
