काठमाडौंको तारकेश्वरमा आजदेखि विद्यालय सञ्चालन गर्न पाउने

– स्वास्थ्यका सबै मापदण्ड पूरा गरी अभिभावकको सुझावमा आजदेखि काठमाडौंको तारकेश्वर नगरपालिकाले नगरभित्रका विद्यालय खोल्न अनुमति दिएको छ । 
कोभिड १९ को संक्रमणको अवस्थालाई समीक्षा गरी भयरहित एवं सुरक्षित तवरमा सञ्चालनको व्यवस्था मिलाउन हरेक विद्यालयलाई निर्देशन दिएको नगर शिक्षा शाखा प्रमुख होमनाथ न्यौपानेले बताए । 
विद्यालयको पठनपाठनलाई नियमित गराउन स्वास्थ्य सुरक्षामा मापदण्ड पालन गर्ने विधि, प्रत्येक विद्यालयमा हेल्प डेस्क निर्माण गर्ने र नजिकको स्वास्थ्य संस्थासँग समन्वय गरी आवश्यकता अनुसार स्वास्थ्य परीक्षण र परामर्श दिने, विद्यालयको सरसफाइ, हात धुने व्यवस्था, विद्यालयलाई दैनिक निर्मलीकरण गर्ने, प्रत्येक दिन कक्षा शुरु हुनुअगावै कम्तीमा पाँच मिनेट कोभिड १९ को संक्रमणका बारेमा विद्यार्थीलाई जानकारी गराउनेजस्ता कामको पालना गरी नगरपालिकाले विद्यालय सञ्चालनमा ल्याएको हो । 

नगरपालिकाले बिहानको प्रार्थना नगर्ने, सकेसम्म एउटा बेञ्चमा दुई विद्यार्थी नराख्ने, शिक्षक–विद्यार्थी र अभिभावकले अनिवार्य मास्क लगाउने, घर जाँदा कक्षाबाट सरासर घरसम्म पुग्ने वातावरण बनाउने जस्ता सुरक्षा मापदण्ड पालना गर्दै विद्यालय खुलाउन निर्देशन दिएको नगरपालिकाले बताएको छ । 

एघार वडा रहेको नगरपालिकामा १८ सामुदायिक र ६४ संस्थागत विद्यालय सञ्चालनमा छन् ।