त्रिविद्वारा वार्ता आह्वान

२०७७ श्रावण १५ बिहीबार ०७:२०:०० मा प्रकाशित

बन्दकर्ता प्राध्यापक भन्छन्ः औपचारिक निर्णय भएको छैन, वार्तामा बस्दैनाैं

त्रिभुवन विश्वविद्यालयले तालाबन्दी गर्ने संगठनलाई वार्तामा बोलाएको छ । त्रिविका शिक्षाध्यक्ष प्राडा शिवलाल भुसालले वार्ताबाट समस्या समाधान गर्न सकिने जनाउँदै वार्तामा बस्न आग्रह गर्नुभएको छ ।

त्रिविका तीन पदाधिकारी र सेवा आयोगको मूल गेटमा ताला लगाएका प्रजातान्त्रिक प्राध्यापक संघले औपचारिक पत्र नआएसम्म वार्तामा नबस्ने अडान दोहो¥याएको छ ।

संघका अध्यक्ष सहप्राध्यापक जगत् तिमल्सिनाले औपचारिक रुपमा पत्र नआएसम्म वार्तामा नबस्ने स्पष्ट पार्नुभएको छ । उहाँले नेकपाका गुट र उपगुटलाई समेट्न गरेको सबै नियुक्ति बदर नगरेसम्म वार्ता नगर्ने बताउनुभयो । उहाँले भन्नुभयो– ‘हाम्रो पहिलो माग त्रिविका उपकुलपति प्राडा धर्मकान्त बास्कोटा, रेक्टर प्राडा पेशल आचार्य र शिक्षाध्यक्ष प्राडा शिवलाल भुसालको राजीनामा तथा नेकपा निकट व्यक्तिलाई गरेको नियुक्ति बदर गर्नु रहेको छ ।’

तर त्रिविले संघको मागलाई इन्कार गर्दै वार्ताबाटै समस्या समाधान गर्न आग्रह गरेको छ । त्रिविले संघ, लोकतन्त्रवादी प्राध्यापक संघ र नेविसंघलाई वार्तामा आउन आह्वान गरेको छ । शिक्षाध्यक्ष प्राडा भुसालले सार्वजनिक रुपमा आह्वान गरेपछि औपचारिक पत्रको आवश्यक नभएको तर्क राख्नुभयो । उहाँले भन्नुभयो– ‘त्रिविले वार्तामा बोलाएको छ, नआए पुनः प्रयास गर्नेछौं । वार्ता कहिले र कहाँ वार्ता गर्ने टुङ्गो लगाएको छैन ।’
त्रिविका उपकुलपति प्राडा धर्मकान्त बास्कोटाले केही दिन पर्खिने र नभए अर्को उपायबाट तालाबन्दी खोल्ने मनस्थिति रहेको बनाउनुभएको छ । उहाँले भन्नुभयो– ‘हामी द्वन्द्व चाहँदैनौ, तर ताला नखोले सुरक्षा निकायको सहयोग लिन बाध्य हुनेछौं ।’

अघिल्ला पदाधिकारीले विभिन्न संगठनले लगाएको ताला तत्काल फुटाउने गरेको प्रसंग जोड्दा उपकुलपति प्राडा बास्कोटाको भनाइ थियो– ‘हामी अहिले नै त्यो बाटोमा जाँदैनौ, समय कुरेर बसेका छौं, यदि ताला नखोले अप्रिय निर्णय गर्न बाध्य हुनेछौं ।’

‘१० दिनदेखि पदाधिकारी कार्यकक्षको मूल गेटमा तालाबन्दी हुँदा त्रिविको कामकारबाहीमा पूर्ण असर परेकाले वार्ता गर्न आह्वान गरेका हांै’ –शिक्षाध्यक्ष भुसालले भन्नुभयो । उहाँले छलफलबाट समस्या समाधान हुने दाबी गर्दै पहिलो कर्तव्य वार्तालाई लिएको बताउनुभयो ।

संघका अध्यक्ष तिमल्सिनाले क्षमता नभएका पदाधिकारीले त्रिवि हाँक्न नसक्ने र अब नियुक्ति गर्दा अनुभवीलाई प्राथमिकता दिनुपर्ने माग गर्दै तालाबन्दी गरेको सपष्ट पार्नुभयो । उहाँले भन्नुभयो– ‘हामीले भागवण्डको राजनीति गरेका होइनौं, सक्षम र अनुभवीलाई नियुक्ति गर्न तालाबन्दी गरेका हौं ।’

शिक्षाध्यक्ष भुसालले उहाँहरुसँग पटकपटक औपचारिक र अनौपचारिक वार्ता गरे पनि पुनः वार्तामा बोलाइएको जानकारी दिनुभयो । उहाँले तालाबन्दीका कारण त्रिविको आगामी आर्थिक वर्षको बजेट तर्जुमा र परीक्षाको तयारी, आर्थिक, प्रशासनिक र प्राज्ञिक काम, ठप्प भएको बताउनुभयो ।

जेष्ठता वरिष्ठता, प्राज्ञिक र विश्वसनीयताको आधारमा पदाधिकारी, डीन, विभागीय प्रमुख र क्याम्पस प्रमुख नियुक्ति गर्नुपर्ने माग गर्दै प्रजातन्त्रवादी प्राध्यापक संघले साउन ५ गतेदेखि तीन पदाधिकारी र सेवा आयोगको मूल गेटमा अनिश्चित्कालीन तालाबन्दी गरेका थिए ।

संघले वैशाख २८, जेठ १३ र २५, असार ४ र २९ गते गरी पटकपटक ज्ञापनपत्र र मागपत्र बुझाउँदा समेत नसुनेपछि बाध्य भएर आन्दोलनमा उत्रेको जनाएको छ ।
(नेपाल समाचारपत्र दैनिकबाट)

ताजा खबर