खासखुस नगर सरकार निदाएको छ
२०७७ बैशाख २७ शनिबार ०८:५६:००
मा प्रकाशित
बिस्तारै पनि नबोल
खासखुस पनि नगर अब।
बिरालो जस्तो हिँड्नू
केही चपाउनु छ भने
बर्कोले मुख छोपेर खानू,
आवाज नगर कतै पनि ।
सन्नाटा होस् यत्र तत्र सर्वत्र
कोही नबोल
सरकार निदाएको छ।
घरमा पसेर बलात्कार भइरहेको छ
आर्तनाद सुनिन्छ कताकता
किन रोएका आमा,दिदीबहिनी र
छोरीबुहारीहरु !
थाहा छैन र,
सरकार निदाएको छ।
सरकारको निन्द्रा बिथोलिने डर छ
बुलडोजर कुदोस् हाम्रो छातिमा
सहनु पर्छ रैती भएपछि
भोकै सुत ,
हल्ला नगर,सुत्न देऊ सरकारलाई
सरकार थाकेको छ।
भयो नरोऊ,न चिच्याउ
सरकारलाई सुत्न देऊ।
बिन्ति छ कोही नबोल
सरकार निदाएको छ मस्तले।
(वरिष्ठ पत्रकार युवराज गौतमको फेसबुकबाट साभार)