गुरु अग्नी हुन्, दिन्छन् ताप ज्योतीको न्यानोपन

गुरु वायु हुन्, फैलाउँछन् सुगन्ध सुभाषको शुद्धतन ।

गुरु आकाश हुन्, महाचेतनाको विशाल अनन्त

गुरु पृथ्वी हुन् , सहनशक्तिको भारबहन पोषण ।

गुरु जल हुन्, गर्दछन् यात्रा अविरल, सिन्चिन्छन् जगत र जीवन ।१

 

  गुरु दीप हुन्,  तेल वात्तिको बल्ने आधार

   बहाउँछन्, गुरुले जीवन उर्जाको निरन्तर धार ।

   गुरु हुन्, तेज ओजशक्ति वलबुद्धि प्रसारको माध्यम

    गुरु हुन्, दिब्य ज्ञानज्योती फैलाउने सर्बोत्तम साधन ।२

 

 गुरु हुन्, महान पवित्र आत्मा सन्देश वाहक परमात्माको

 गर्दछन् गुरुले कर्तब्य अनि कर्म, अधिकतम जोस जाँगरको ।

 गुरुमा हुन्छ, अडिग संकल्प  वचन अमृत  निडर अनि सत्यवादिता

 प्रदुषित क्लेषकाया विकार हटाउने कदममा, लिन्छन केही कठोरता ।

 बजाउँछन्  गुरुले मुरली, लयबद्ध एकै सुरतालमा

 उन्दछन गुरुले फूलका माला, थुँगाहरु एकै धागोमा।३

 

गुरु नृत्य हुन्,  स्थिरता  र सन्तुलनबीचको गतिशिलता

गुरु संकीर्तन हुन्, सुरलय भक्तिभाव र समर्पणको माधुर्यता  ।

गुरु अक्षर हुन्, शब्द वाक्य र अर्थको मिठो संयोजन

गुरु श्रवण हुन्, मधुर ध्वनी र तरंग बीचको कर्णप्रिय सुमिरन ।४

 

गुरु कला हुन्, मुक्त कंठ अनि प्रशंसा जुक्ति

गुरु भक्ति हुन्, शिव संकल्प अनि इच्छा शक्ति ।

गुरु मिठास हुन्,  भोक भोजनको तृप्त रसास्वादन

गुरु सुगन्ध हुन्,  फूल मन्जरीको मिठो वास्नावादन ।५

 

गुरु हुन् जीवनकलाका सिद्धहस्त कलाकार

गुरु हुन् उल्झनका एक कुशल सुल्झनकार ।

गुरु हुन् चरित्र सुधारक, चित्तबृत्ति शुद्धिकरणकर्ता

गुरु हुन् प्रबन्ध संचालक, जन्ममरणको मुक्तिभर्ता ।

गुरु हुन् मन शरीर, उत्कृष्ठ तन्त्रसंग्रह अनुभूति

गुरु हुन् कर्मशिलता, परिश्रम मेहनतको परिणति ।

गुरु हुन् गतिला पाठ, सिकार्इ ठक्कर अनि हण्डरका

 गुरु हुन् अनुभव भोक्ता, आफ्नै बुझाई अनि भोगाईका ।६

 

गुरु द्रष्टा हुन्,  सुखदुःख दिनरात बरावरी

उचनिच सबैप्राणीमा करुणा छ सरावरी ।

गुरु हुन् इन्द्रियानुभुति, ग्रहणशिलता अनि रीतिस्थिति

गुरुको सदैव गुणकारी उच्चताबोध अनि भावस्थिति ।

गुरुले अनुशासन प्रेरित दिलाउँछन् शिक्षादीक्षा

गुरुलाई रत्तिभर अपेक्षा छैन, गुरुदक्षिणाको भिक्षा ।

गुरु बस्तछन्, समयऋतु अनुकुल मनशरीर अनि प्रकृतिमा

गुरु हुन्, गन्तब्य यात्राको साधन, पुर्याउने जीवचेतना  मूलस्रोतमा ।७

 (सदगुरुप्रति समर्पित, सन्दर्भ: बुद्धपूर्णिमा)