आयुष्मानले गरे ‘ड्रिम गर्ल’ को सफलतापछि यस्तो घोषणा
![](https://archive.saralpatrika.com/uploads/news/images/aayushman_IhPaFX8eqm2019-09-23-02-10-55.jpeg)
बलिउड अभिनेता आयुष्मान खुरानाले ‘ड्रिम गर्ल’ को सफलतापछि ‘प्रोफिट शेयर क्लब’ मा सहभागी भएका छन् । भारतीय पत्रिका दैनिक भास्करसँगको कुराकानीमा उनले प्राफिट क्लबमा संलग्न भएको स्वीकार गरेका छन् ।
अब उनी पारिश्रमिकभन्दा नाफाको हिस्सेदार हुनेछन् । कारोबारको यो प्रणालीमा प्रोड्युसरलाई बढी फाइदा पुग्छ । भने अभिनेत्री तथा अभिनेतालाई महङ्गो पारिश्रमिक दिने झन्झट हुँदैन । यो प्रणालीमा फिल्म बनाउँदा बजेटको ठूलो हिस्सा फिल्म बनाउँदा नै खर्च गरिन्छ र राम्रो फिल्म बन्छ । त्यसपछि नाफा जति सबैलाई बराबर बाँड्ने गरिन्छ ।
आयुष्मान भन्छन्, ‘मैले यसको सुरुवात गरिसकेको छु । यदि पहिले लिने पारिश्रमिक कम गरियो भने नाफा बाँडेर लिन सकिन्छ । पारिश्रमिक लिने कि फिल्म चलेपछि नाफा लिने भन्ने कुरा अभिनेता तथा अभिनेत्रीमा भर पर्छ । यसका साथै, फिल्म उत्पादन पक्षसँगको सम्बन्धले पनि यसमा महत्वपूर्ण भूमिका खेल्छ । स्क्रिप्टले कस्तो माग गर्छ ? त्यसले पनि फरक पार्ने गर्छ ।’
प्रोफिट शेयर क्लबमा सलमान खान, शाहरुख खान, अक्षय कुमार, अजय देवगन र ऋतिक रोशन पहिलेदेखि नै सामेल छन् । अमिर खानले ८० प्रतिशत नाफा लिन्छन् भने सलमान खानले ५० प्रतिशत मात्रै नाफा लिँदै आएका छन् । साथै, डिजिटल अधिकार पनि उनीहरु नै लिने गर्छन् ।