आन्तरिक पर्यटनले हौसियो चितवन
चितवन, २५ चैत । विदेशी पर्यटक घट्दै जाँदा यतिबेला आन्तरिक पर्यटकले चितवनको पर्यटकीय क्षेत्र भरिएको छ । नयाँ वर्षको पूर्वसन्ध्यामा परिवारसहित घुमफिर गर्ने नेपाली प्रचलन बढेसँगै यो मौसममा पर्यटकीय महत्व बोकेका ठाउँहरु आन्तरिक पर्यटकले भरिन थालेका छन् ।
जिल्लाको प्रमुख पर्यटकीय गन्तव्य सौराहासँगै पटिहानी, जगतपुर र मेघौलीका होटल आन्तरिक पर्यटकले भरिएका छन् । क्षेत्रीय होटल सङ्घ चितवनका अध्यक्ष सुमन घिमिरेकाअनुसार अहिले आएका पर्यटकमध्ये ६० प्रतिशत स्वदेशी रहेका छन् भने ४० प्रतिशत हाराहारी विदेशी रहेका छन् ।
सौराहाको कूल क्षमताको ६० प्रतिशत पर्यटकले भरिएको घिमिरेले बताए । गतवर्ष भन्दा यसवर्ष स्वदेशी पर्यटक बढेको उनको भनाइ थियो । स्कुले विद्यार्थीको परीक्षा सम्पन्न भएसँगै घुमाउने प्रचलन बढेकै कारण यो मौसममा गतवर्ष भन्दा १० प्रतिशत नेपाली पर्यटक बढेको उनले बताएका छन् ।
विगतमा पनि चैत मसान्तका दिन शतप्रतिशत होटल भरिने उनले बताए । कुनै समय नेपालीलाई पर्यटक नमान्ने यहाँका व्यवसायीको अहिलेको रोजाइँ नेपाली हुने गरेको छ ।
व्यवसायीका अनुसार कोठाको रकममा मूल्य घटाउन जोड गर्ने नेपालीले खानपानमा भने विदेशीको भन्दा धेरै खर्च गर्ने भएपछि होटल व्यवसायीको रोजाइँमा नेपाली पर्न थालेका हुन् । घिमिरेका अनुसार नयाँवर्ष नजिकिएका कारण पनि होटल ‘बुकिङ्’ निकै बढ्दै गएको छ । हिमाल चढ्न नेपाल आएका विदेशी पर्यटक पनि यहाँ आउने क्रम जारी छ । कूल विदेशी पर्यटकको ५० प्रतिशत चिनियाँ रहेका छन् भने अन्यमा भारतीय, युरोपियन र अमेरिकन रहेको घिमिरेले बताए ।
पर्यटन विकास समिति चितवनका महासचिव विश्व सुवेदीका अनुसार कतिपय नेपालीको आम्दानी बढेसँगै पारिवारिक घुमफिर गर्ने प्रचलन वर्षेनी बढ्दै गएको छ । जसको प्रभाव प्रत्यक्ष रुपमा पर्यटन क्षेत्रमा परेको व्यवसायीको भनाइ छ ।
हरेक हप्ताको अन्तिम दिन परिवारसँगै बाहिर खाने, सबैको फुर्सद भएका बेला घुम्न जाने नेपाली प्रचलन बढेसँगै स्कुले बच्चाको बिदाको समय पारेर घुम्न आउने नेपाली बढेको उनले बताए ।
वर्षेनी यो सङ्ख्या बढ्दै गएको भन्दै उनले विदेश जानु भन्दा पर्यटकीय गन्तव्यमा आन्तरिक पर्यटकलाई आकर्षीत पार्नुपर्ने भनेका छन् । घुमफिरमा कला–संस्कृति, रिति–रिवाज, भौगोलिक अवस्था लगायतको अध्ययन भन्दा खानपिनमा नेपाली बढी रमाउने गरेको सुवेदीले बताए । चितवन आउने पर्यटक जङ्गल सफारीमा बढी केन्द्रित हुने गरेका छन् ।
क्षेत्रीय होटल सङ्घ कसरा सेक्टरका अध्यक्ष गणेश पौडेलले विदेशी पर्यटक घट्दै जाँदा आन्तरिक पर्यटक बढ्दै गएको बताए । सो क्षेत्रमा ३० प्रतिशत हाराहारी आन्तरिक पर्यटक रहेको उनले बताए । रासस
चितवन राष्ट्रिय निकुञ्जका प्रमुख संरक्षण अधिकृत वेदकुमार ढकालले आन्तरिक पर्यटक बढ्नेक्रम जारी रहेको बताएका छन् । तीन दिनअघि पानी पर्दा समेत सौराहाबाट चल्ने ३२ वटा जीप आन्तरिक र बाह्य पर्यटकले भरिएको भन्दै उनले धेरै नेपाली देखिने गरेको बताए । विगत केही वर्षयता नेपाली घुमफिर गर्ने प्रचलन बढेर गएको ढकालले बताए ।
चितवन र नवलपुर क्षेत्रमा पर्यटकीय होटलको सङ्ख्या १५० वटा रहेका छन् । सौराहा, भरतपुर, पटिहानी, जगतपुर, मेघौलीसँगै नवलपुरको नारायणी छेउमा पर्यटकीय होटल रहेका छन् । पर्यटकीय स्तरका ती होटलमा रु १५ अर्ब भन्दा बढी लगानी भइसकेको छ । नेपाली पर्यटक बढ्दै गएपछि नयाँ ठूला होटलमा लगानी गर्ने क्रम पनि बढ्दो छ ।
